Rənglərin psixoloji təsirləri markaların marketinq və satış strategiyalarında çox əhəmiyyətli rol oynayır. Marketinq strategiyalarınızda rəng psixologiyasından istifadə edərək müsbət və ya mənfi mesajlar verə və alış qərarlarına təsir göstərə bilərsiniz.
Rənglərin seçilməsində psixoloji amillə yanaşı texnoloji amillər də nəzərə alınmalıdır. Məsələn, rəqəmsal ekranda sizin və şirkətiniz üçün xüsusi olaraq hazırlanmış yaradıcı çap məhsullarına baxdığınız zaman, çapdan sonra fərqli bir rənglə qarşılaşa bilərsiniz. Məhsul dizaynı ilə ortaya çıxan məhsul arasında rəng fərqi ilə qarşılaşmamaq üçün Pantone rəng katalogundan istifadə olunur.
Hər il növbəti ilin trend rəngini açıqlayan Pantone Rəng İnstitutu 2021-ci il üçün iki rəngi birdən seçdi. Beləliklə, Pantone gələn ilin rənglərini boz (Ultimate Gray) və sarı (Illuminating) olaraq təyin etdi.
Sarı rəng (Illuminating PANTONE 13-0647) ümid və xoşbəxtliyi simvolizə edir. Boz (Ultimate Gray PANTONE 17-5104) isə əzmkarlıq və dayanıqlılığın simvolu kimi diqqət çəkir.
Əsas hədəf diqqət çəkmə, səmimiyyət və məlumat vermə olduqda, rəqəmsal marketinq dünyasında sarı ən çox seçilən rənglərdən biridir. Sərbəstlik və rahatlıq hissini, enerjisini və istehlakçıya müsbət təsirini birbaşa ötürən sarı rəng markaların əvəzolunmazıdır. Sarı rəng müştərilərin diqqətini çəkir və ünsiyyəti gücləndirir. Nəticədə sarı rəng alış prosesinə müsbət təsir edir. Yəni markalar ünsiyyət və kampaniya işlərində sarı rəngdən istifadə edərək istehlakçıların gözündə cəlbediciliyini artıra bilər.
Araşdırmalar göstərir ki, istehlakçıların məhsulu alıb-almamaları haqqında qərar verməsi 7-9 saniyə çəkir. Bu səbəbdən qablaşdırmanın sarı rəngdə olması satışın artmasına müsbət təsir göstərir. Çünki bu rəng müştərilərin diqqətini və markaya marağını artıran vacib bir amildir.
Dünyanın ən böyük neft şirkətlərindən biri olaraq tanınan Shell öz loqosunda nikbinlik kimi müsbət duyğuları aktivləşdirən və aydınlığı təmsil edən sarı rəngdən faydalanır.
İnşaat avadanlığı istehsalçısı olan “Cat” də sarı rəngdən istifadə edən brendlərdən biridir. Cat tərəfindən istehsal olunan inşaat avadanlıqları inşaat sənayesində çox əhəmiyyətli bir yerə sahibdir və inşaat sektoru təhlükəsizliyin prioritet olduğu bir sahədir. Bu səbəbdən də Cat markası “diqqət” mənasını verən sarı rəngi öz loqosunda ön planda saxlayıb.
Pantone-nun digər rəngi olan boz isə texnologiya markalarının tez-tez müraciət etdiyi və rəqəmsal aləmdə ən çox istifadə edilən rənglərdən biridir. Bu rəngin ən vacib xüsusiyyətləri gözləri yormaması, diqqəti yayındırmaması və mesajların istehlakçıya ən sadə şəkildə çatdırılmasına imkan verməsidir. Buna görə markalar detallara diqqət yetirməyi sevən istehlakçılar üçün boz rəngi seçirlər. Universal olan boz, loqodakı digər rənglərdən asılı olaraq fərqli mesajlar verə bilər.
Qida və içki markaları üçün ilk seçim olmasa da, Nestle və Grey Goose kimi məşhur qida və içki markaları, loqo dizaynında çox sərt qaydaların olmadığını isbat edərək, boz rəngindən istifadə etdilər.
Morpho sarının səmimiyyətinin və bozun ciddiyyətinin gücünə inanır. Bu iki azad rəngin vəhdəti gələcək marketinq fəaliyyətimizdə komandamıza yeni baxış bucağı gətirərək daha uğurlu addımlara yol açacaqdır. Biz rənglərin gücünə inananlardanıq. Bəs siz?